推荐预测：弗赖堡大反击

弗赖堡大反击

弗赖堡后衞 基斯甸根达

慕逊加柏有前冇后

今轮德甲喺周六凌晨率先上演独脚戏，弗赖堡主场迎战慕逊加柏。弗赖堡喺联赛重开之后，4战仍然不胜，但佢哋主场往绩佔优，有望反弹。另边厢，慕逊加柏踢法有前冇后，肯定唔会坐以待毙实抢士哥，中位数2.5球嘅入球大值博。

虽然弗赖堡整体实力只属一般，但往往可以喺主场踢出超水准，今季联赛主场就曾经打和第2位嘅多蒙特2比2，同埋以2比1击败第3位嘅RB莱比锡，可见佢哋喺自己地头，抢分能力非常强，所以今场即使遇上第4位嘅慕逊加柏，应该无惧同对手斗攻。

前线3子入球停不了

事实上，弗赖堡近9次联赛主场对慕逊加柏取得8胜1和，而最近3场仲係全胜添。其中上季凭3位前锋尼斯彼德臣、禾特舒密特、卢卡斯贺拿各入1球，以3比1胜出。呢3人今季表现仍然出色，已经合共轰入19球，有力撕开慕逊加柏防线。

至于慕逊加柏现时仅以较佳得失球差，力压同分嘅利华古逊佔据第4位，为夺取下届欧联入场券，绝对冇失分空间，相信今场作客都会照攻。

慕逊加柏喺德甲复赛后，踢得非常开放，包括作客以3比1击败法兰克福，上场更加大胜林柏联4比1。同埋佢哋近4次联赛对弗赖堡，有3次总入球达4球或以上，包括首循环慕逊加柏赢4比2，预料双方今场又会搏拳，有望再演入球骚。