推荐预测：坦波夫主守有森做细界

今晚俄超独脚戏上演护级大战，FC坦波夫于中立场硬撼森马拉。FC坦波夫攻力疲弱，仲冇埋地利唔敢乱嚟，森马拉新兵太多磨合需时，仲有中场悍将安顿辛高夫斯基坐波监，必先做好防守，为免喺呢场「护级6分波」有闪失，一定稳打稳扎，宁捧2.5球嘅入球细。

森马拉新兵多磨合需时

在新冠肺炎阴霾下，俄超係依家欧洲少有地仍继续开打嘅联赛之一。FC坦波夫因为本身嘅主场唔符合联赛要求，今仗要改喺500公里外嘅中立场下诺夫哥罗德球场举行，顿失地利，呢班波今季21场联赛只入23球，单计近4仗联赛，就有3仗食白果，攻力之弱有办你睇，因此更加重视防守，经常使用5人防线，以稳守突击博偷鸡。

另一边厢，森马拉前锋简奴尼哥夫仍要养伤，苏保利夫亦喺冬季转会窗改投莫斯科斯巴达，两人正正係首循环轻取FC坦波夫2比0嘅入波功臣。虽然佢哋亦增添6名新兵，包括借得莫斯科斯巴达中场古辛高夫，但人多手脚乱，班新兵明显未适应，而且中场悍将安顿辛高夫斯基上仗领红牌被逐，今仗需要停赛，冇咗佢坐镇中场做扫荡，势必要喺防守多下工夫，查实佢哋攻力仲差过FC坦波夫，今季联赛入得22粒咁大把，单计近12场联赛，就有11场开2球或以下。翻查纪录，两军近4次正面交锋，全开2球或以下，由于大家同于下游挣扎，喺呢场「护级6分波」唔敢轻举妄动，海军斗水兵格局入波唔慌多，2.5球嘅细盘稳开。