推荐预测：慕逊加柏屠隆洩愤

德甲史上首场闭门作赛

今晚德甲独脚戏上演莱茵河打吡，慕逊加柏主场迎战科隆。慕逊加柏上轮联赛不敌多蒙特劲唔抵，教练马高路斯声言今晚要出气，遇上防线人脚唔齐嘅科隆，黑柴推介慕逊加柏让半一嘅上盘。

基于新冠肺炎疫情影响，赛会寻日公布今仗要闭门作赛，亦係德甲史上首场闭门作赛赛事。慕逊加柏上周末主场1比2输畀多蒙特，搞到联赛榜4哥位置都畀利华古逊抢埋，但该仗係慕逊加柏今季其中一场代表作，全场形势甚至比多蒙特更好，可惜欠运之馀，庄拿斯荷夫曼一次畀对方门将路文贝基侵犯亦未获应得嘅12码，最后冇分落袋非常气愤。

教练马高路斯赛后话，佢哋仲有呢场补赛喺手，今晚有决心攞晒3分抢番前4位置，即使有中场主力科利安尼奥侯斯停赛，但箭头马古斯杜林伤愈复任正选，接连喺主场出击，体力亦佔优势。

科隆防线唔齐脚难捱

讲近绩科隆甚至喺慕逊加柏之上，近10场德甲赢咗8场，联赛榜由尾3回升到中游第10位，不过主帅基斯度亦承认，佢哋同慕逊加柏级数仍然有别，今仗只能尽力而为，何况后防大将施巴斯坦波拿奥同队长祖拿斯赫达都因大腿肌肉受伤缺练，上阵机会唔乐观，连同养紧伤嘅薛祖斯同卡达巴治，防线人脚唔齐，要抵挡慕逊加柏强攻相当吃力。