推荐预测：华伦残阵益阿特兰大

今晚另一场欧联16强次回合，华伦西亚主场火併阿特兰大。华伦喺首回合惨败1比4，加上两大中坚非伤即停，撞正擅打反击嘅阿特兰大坚牙烟，宁捧客胜。

防线主力非伤即停

「蝙蝠兵团」华伦首回合惨败1比4，表现曳到冇朋友，不过总算取得1个作客入球，若果今场淨胜3比0，就可凭较多作客入球晋级，可惜佢哋防线多灾多难，先喺年头有中坚加雷重伤提早收咧，拍档基比尔包列斯达于分组赛尾轮对阿积士「直红」被逐，继上仗后今场仲要坐波监，连另一守将文加拉都伤埋，焗攻下犹如纸扎嘅防线，势必暴露更多空位。此外箭头麦斯高美斯亦受伤，洛迪高摩连奴近8仗有上阵赛事入得1粒，真係攻守都靠唔住。

阿特兰大喺分组赛奇迹出线，16强首回合更大炒华伦，全靠超强火力。喺「进攻狂人」加斯柏连尼执教下，一众射手如路尔斯梅利尔、杜云沙柏达及伊利锡等都可尽情发挥，难怪佢哋近6场豪取5胜1和狂轰24球，全开3球或以上，包括出现2次单场入7粒，火力劲得人惊，造访防线曳爆嘅华伦，势必有更多打反击机会，有力再赢1场，历史性首度进身8强。