推荐预测：慕逊加柏多蒙特捱细界

对赛10连败Vs两硬仗跟尾

周六晚德甲压轴戏上演前4激战，慕逊加柏主场迎战多蒙特，慕逊加柏对赛10连败输到惊，就算主场都唔敢过分抢攻；多蒙特面对今季最繁忙同最重要嘅1星期，未来几日要应付开季至今最重要嘅两场比赛，好难唔分心，两军各有顾忌，投注首选中位数3.5球细盘。

慕逊加柏近9仗德甲主场8胜1和，但上次主场对贺芬咸领先后始终攞唔到保险球，最终补时被逼和跌番两分，球队进攻组织时好时坏，计级数始终低过拜仁、莱比锡同多蒙特，现时人脚未係争冠材料。最惨仲係自2015年8月至今，慕逊加柏10次面对多蒙特输晒，包括今季联赛首循环同德国盃第2圈，摆明畀人恰死，心理冇阴影至出奇，今仗仲有主力箭头马古斯杜林因伤上阵成疑，相信唔敢过分急进。何况佢哋虽然落后多蒙特两分，但仲有主场对科隆嘅补赛未踢，今仗和波对佢哋联赛榜形势影响唔大。

PSG史浩克等紧多蒙特

多蒙特喺艾宁夏兰特加盟后，夹住全球抢手货查顿辛祖，呢对19岁孖宝确实威力非凡，不过经过频密赛程消耗，加上队长马高列奥斯同中场汤马士迪兰尼养伤，兵源削弱，球队近期火力明显降温，近两轮联赛面对云达不来梅同弗赖堡只能小胜，好在防线进步大，近4场正式赛事加埋只失过1球。不过今晚对慕逊加柏嘅前4大战，对佢哋嚟讲只係未来1周分量最轻嘅比赛，因为下周三晚欧联作客对巴黎圣日耳门，固然决定8强资格，嚟紧下周末遭遇史浩克嘅鲁尔区打吡战，对多蒙特球迷嚟讲更加非胜不可，今晚预期会争取控球拖慢节奏悭体力，两大王牌夏兰特同辛祖亦未必踢足，随时同慕逊加柏斗捱「细」界。