专家拆局：布拉加格流再演入球骚

今晚除咗欧联大战，仲有欧霸32强次回合独脚戏，葡超布拉加主场斗苏超格拉斯哥流浪；两军首回合已经合演超激入球骚，格流喺两球落后下连追3粒反胜，今晚再度交锋，双方各有两名主力后衞养伤，焗住以攻代守战情又点会闷？黑柴撑中位数2.5球大盘。

欧霸16强次回合比赛原本听晚踢，不过欧洲足协有见今轮3支葡超球队都主场出师，波图同宾菲加分别霸佔咗听晚两个直播时段，为免撞期影响收视，就安排布拉加嘅主场赛事提早一日举行。睇牌面同经验，布拉加明显稍胜格流，不过佢哋喺少帅阿摩林带领下，主场踢法有前冇后，今季葡超11场主场失咗14球，欧霸5度主场出击有4场总入球达到4个或以上。布拉加上轮对塞图巴尔嘅联赛，刻意轮换畀主力休息，首席射手保连奴费南迪斯喺后备席坐足全场，摆明等今场搏命，不过守将华莱士山度士同域陀托美拿齐养伤，防线实力有所削弱。

「小赫杰」首回合入2粒

格拉斯哥流浪上轮奇迹反胜，大家又睇到前红军队长谢拉特嘅激情庆祝，何况格流喺分组赛面对另一葡超班霸波图都1胜1和，更添佢哋争出线信心，虽然今仗阵容不整，后衞波拿巴列锡、希兰达同37岁老将射手迪科尔养伤，但歇冬期由亨克借用嘅罗马尼亚名将赫杰之子，21岁攻击手伊亚尼斯赫杰迅速融入球队，首回合仲梅开二度做埋反胜功臣，由佢配合哥伦比亚多产射手摩尼路斯，前线有足够火力同布拉加对攻。