专家拆局：美斯蓄锐巴塞反转皇苏

周六晚西甲上演前列对决，皇家苏斯达主场挑战巴塞隆拿。巴塞靠美斯频频交出球王级表现，令过往常被诟病嘅作客脚软问题大大改善，加上两军近年交手，巴塞佔尽上风，呢场有望力取佳绩，撑客胜。

近7次对赛全胜

今季西甲榜首形势紧凑，赛前巴塞仅以得失球差力压2哥皇家马德里排榜首，稍有差池「1哥」席位随时会冇咗，好彩近期顶住巨大成绩压力嘅巴塞，频频交出令人信服嘅表现，其中抢尽风头嘅依然係美斯，继早前喺马德里体育会嘅恶战中一箭定江山后，阿根廷球王上仗联赛再演帽子戏法，带领巴塞以5比2轻取马略卡，今季个人联赛已经入12球，高踞射手榜榜首前列。呢位球队核心未有随巴塞出征周中欧联赛事，可以抖到足，以最佳状态面对呢场联赛对碰，巴塞进攻相当有睇头。

今季发挥时有惊喜嘅皇家苏斯达，赛前高踞积分榜前列，係有力争取欧战席位嘅球队之一，可惜近期走势出现波动，上仗就仅以0比0闷和弱旅华拉度列，状态成疑。回顾往绩，皇苏近7次同巴塞交手全败，锋芒完全畀对手掩盖，今仗随时又被鱼肉，难逃一劫，捧返客胜较为明智。