专家拆局：红军踩油衝上盘

热刺快车入错后波

经过上周英足盃回一回气后，今晚英超重燃战火，无敌是最寂寞嘅利物浦，将遇到「寸王」摩连奴率领嘅热刺挑战。热刺快车档期愈开愈打倒褪，入晒后波，面对榜首嘅利物浦肯定有麻烦，红军让半一，乐比综合咗4大理由撑上盘。

高普调兵遣将有惊喜

利物浦目前喺联赛榜遥遥领先13分仲要少踢一场，冠军已成为囊中物，不过最恐怖嘅係红军未有放软手脚迹象，球员亦似乎有用不完嘅体力，唔觉有咩疲态，呢方面真係要大讚高普嘅调兵遣将能力，喺适当时间畀主将休息，亦肯畀第二梯队嘅球员机会。好似上周嘅英格兰足总盃第三圈咁，红军即使面对同市宿敌爱华顿，依然派出大量后备上阵，而呢班二线兵亦不负所託，小胜爱华顿嘅正牌军1比0晋级，可见利物浦无论正选、后备球员都处于极佳状态，亦係利物浦能够喺联赛上半季取得19胜1和佳绩嘅原因，睇嚟绝对有机会打破全季100分嘅英超纪录。

热刺两大领袖齐缺阵

反观热刺自摩连奴执掌后，成绩未见有重大突破，经过3连胜蜜月期，先后不敌曼联、车路士及修咸顿，联赛假期快车4战仅胜1场，本来虚耗已极大，最惨係足总盃对住英冠仔米杜士堡，派出强阵应战都係仅和1比1需要重赛，令到主力球员冇得争取时间休息。

热刺嘅兵力一向係Big 6之中最弱，而且两名领袖洛里斯及哈利卡尼先后受伤，两人嘅地位更加係无人可代替，其中后备门将加沙宁加嘅表现可用得人惊嚟形容，一日搵佢做「巴士司机」，等于一架溜后嘅车冇埋「迫力」，呢架大巴都几难泊得成，至于哈利卡尼最新消息要抖到四月，更难同利物浦周旋。除咗实力同近况，上季两队3次交手加埋今季首循环交锋，利物浦取得全胜，睇怕热刺今场都难以逆转。