专家拆局：帕尔马反弹心切捧得过

星期一波少少哋，最适合以小博大，阿King精选条过关3串1畀大家，先讲场有得直播嘅意甲，帕尔马主场迎战莱切。帕尔马主场表现不俗，曾经砌低劲旅罗马，而且莱切近况极沉，录得3连败，帕尔马主胜有1.75倍抵玩到烂。

帕尔马虽然歇冬后首战不敌阿特兰大，但由于係作客，今场返主场又有唔同发挥。虽然帕尔马今场有巴利拿停赛，但顶替佢嘅艾拔图加斯更后生，反而增加咗中前场线活力。帕尔马靠主场抢分，而且佢哋主场对莱切往绩有绝对优势，近6次交手获4胜1和1负，加上莱切态沉，新年首战主场死顶乌甸尼斯，但最终喺87分钟失守，以0比1输波，严重影响士气，延续歇冬前颓势，录得3连败，相信今场都唔係帕尔马对手，先拣主胜。

「阿青」半场胜值博

过关先拖隻荷乙阿积士青年队半场胜，佢哋作客燕豪芬青年队。两支传统班霸嘅青年队喺荷乙表现各异，燕豪芬青年队现时排17位，最近6场输4场，「阿青」近4场全胜，仲要全部半场已经领先对手，今场拣半场客胜啱数。最后法乙罗连安特对卡昂，两军上周末都喺法足盃过关，罗连安特今场赢波就可以做1哥战意高，卡昂首循环主场都输波，作客更加唔乐观，主胜稳阵。