专家拆局：鹊战唔掂车仔半和格

周日凌晨英超尾场戏码，纽卡素主场硬撼车路士。季初作客强势嘅车仔，近期客战表现转趋飘忽，对住英超弱旅更频频失分，呢次造访纽卡素都难有把握全取3分。尤其「喜鹊」主场对亲劲旅都特别醒神，有力顶住车仔半场攻势，一于吼实半场和。

纽卡素近4场联赛只得1分，状态远不及上场联赛大胜般尼3比0嘅车路士，而且纽卡素啱啱喺英足盃重赛以4比1力挫罗奇代尔，体力消耗亦比周中没有比赛嘅车路士大，就算主场出击亦难抢得先机。不过，考虑到车路士对上6次联赛作客圣占士公园只得1胜1和4负，加上纽卡素今季主场迎战Big6球队表现特别醒神，除开锣战仅负阿仙奴0比1外，之后分别击败曼联及同打和曼城，3战上半场都同对手未分胜负，防线有能力同强敌周旋。

遭遇弱旅例牌窒油

季初车仔作客一度气势如虹，连胜走势没法挡，不过自11月尾不敌曼城之后，就被打窒咗条气，近6仗作客仅取2胜3和1负，包括早前曾作客以1比3不敌爱华顿，以及1比1遭白礼顿逼和，令人怀疑车仔面对实力较弱嘅对手係唔係有轻敌之嫌。加上车路士今季11场联赛作客只有1场保持清白之身，防线欠稳，呢场预料都唔敢过分抢攻，博半场和最稳阵。