专家拆局：光辉上盘冇甩拖

胜利作客输到慌

澳职今日上演3场比赛，波童重心放喺尾场珀斯光辉主场斗墨尔本胜利。胜利今季作客联赛输到慌，加上啱啱喺亚冠盃同鹿岛鹿角激战一场，体力输蚀靠唔住，光辉让半一必捧上盘。

作为澳职史上成绩最好球队之一，胜利今季表现冇晒王者风范，开季15场联赛输8场，当中近6场作客输5场，依家喺联赛榜排第8，有机会继2011至12球季后再次失落季后赛资格。胜利早前炒咗今季先上任嘅德国教头马高告斯，近2场联赛依然先后输畀阿德莱德联及FC悉尼，表现冇乜起色，稍为安慰係球队刚刚喺亚冠盃附加赛作客击败鹿岛鹿角，成功进身分组赛，不过呢场比赛胜利搏得好尽，相隔3日又要飞去西面城市珀斯，接连作客都咪话唔攰。

光辉上场作客墨尔本城虽被逼和终止6连胜走势，不过墨城话晒係现时联赛榜2哥，作客能够保住1分已经算唔错，而且光辉近7场联赛有6场冇失波，防守演出依然可靠，今次有主场之利可望重敲胜鼓，光辉让半一波童捧上盘。

喷射机防线穿窿反得过

另外两场比赛，头场纽卡素喷射机主场对西部联；喷射机近8场联赛1和7负，加埋失咗23球，西部联近4场虽然输咗3场，但入球能力比主队好，西部联有得受让，让球客胜捧得过。

至于另一场上演今届澳足盃决赛翻版戏码，阿德莱德联主场斗墨尔本城；阿联喺早前澳足盃决赛大胜墨城4比0捧盃，心理上佔优；墨城踢法有前无后，正宗入得又失得，今场预计会有唔少入波出现，中位数2.5球入球大最稳阵。