专家拆局：贺芬咸下盘冇甩拖

拜仁留力周日打硬仗

德国盃今晚深夜续演最后4场16强赛事，最受注目当然係班霸拜仁慕尼黑主场迎战贺芬咸，拜仁除咗要争晋级外，亦想报首循环联赛败辱，不过佢哋嚟紧周日要喺德甲争霸关键战火併新贵RB莱比锡，赢输对前景影响甚大，今仗除争胜之外亦要保留体力避免受伤，想大炒当弗嘅贺芬咸有难度，拜仁让到两球半、三球过分咗，黑柴宁捧贺芬咸下盘。

拜仁新帅汉斯弗利克令球队上下一心，于德甲6连胜，时隔4个月终于重返榜首，不过上轮作客对弱旅缅恩斯，前线火力已经冇较早前咁疯狂，踢到26分钟领先3球后已收够筹，尽量控球在脚节省体力，毕竟拜仁兵源唔係咁充裕，现阶段唔应该去得太尽。何况今仗对贺芬咸后，嚟紧星期日就会喺德甲榜首大战恶斗莱比锡，拜仁目前只有1分领先优势，对莱比锡若有闪失，今季德甲冠军之争势难安枕，随时会影响埋月尾欧联淘汰赛备战工作，今仗当然要避重就轻，过到关就收货。体育经理沙利咸美斯赛前亦话，拜仁季初输畀贺芬咸係宝贵一课，佢哋今仗嘅态度必定会加倍小心谨慎。

近6次交锋各赢3次

事实上贺芬咸一向係拜仁最唔喜欢面对嘅猪头骨，两军近6次碰头各赢3次，拜仁赢过最大比数嘅1次係5比2，结合今仗盘口都只能赢半个盘，何况贺芬咸今季喺新帅舒路达带领下，更加贯彻稳守快攻风格，首循环就曾经作客赢过拜仁2比1，亦喺主场赢过多蒙特同反胜利华古逊，绝对係遇强愈强。舒路达嘅思路非常清晰，讲明防守永远容易过进攻，只要练好快速反击，对手强攻就正中下怀。贺芬咸歇冬期重金引入西维尔嘅以色列前锋摩尼斯达保，以及多蒙特丹麦快翼积及拿臣，多咗呢两位攻击手，相信会令拜仁嘅进攻有更多顾忌。