专家拆局：禾堡残缺让客恩物

伤兵满营分心欧霸

周日晚德甲有好心水，中游嘅禾夫斯堡主场迎战护级嘅缅恩斯，禾堡排名同纸上近绩睇落都胜一筹，但实际上好大程度靠拚劲同运气，计整体实力根本高唔得过缅恩斯几多，加上分心欧霸淘汰赛同阵容严重不整，今仗冇本钱让状态好反击快嘅缅恩斯，黑柴推介让球客胜。

禾堡近3轮联赛两胜1和，但赢嘅只係包尾柏达邦同防线严重犯错嘅贺芬咸，另一仗主场和护级嘅杜塞尔多夫，更加係冇乜埋门嘅世纪闷战，睇到前线创造力甚低，今仗赛前3日啱啱喺欧霸16强首回合主场迎战瑞典弱旅马模，原本谂住抽好籤可以轻鬆取胜，点知半场咬唔入对手，到下半场仲要先落后，全靠对手箭头艾锡泰连摆乌龙至险胜2比1。禾堡喺联赛无欲无求，对欧霸甚为重视，相信会更重视嚟紧周中作客瑞典嘅次回合比赛。

新帅有料缅恩斯战力升

除咗分心欧霸，禾堡阵容亦好残，新援中坚邦拉锡同中场大脑麦斯美艾洛特今晚双双停赛，队长古拿禾古受膝伤困扰对马模一役缺阵，能否复出唔算乐观，左闸洛斯利朗对马模一役亦因为大腿受伤半场被换走，兵源短缺兼赛程频密，教练格拉斯拿点样轮换？真係头都大埋。

缅恩斯喺新帅拜亚罗沙领军后大有进步，斗志同阵上细节都做得好，较早前力撼慕逊加柏同拜仁慕尼黑都见威胁，前仗作客爆冷赢哈化柏林，防守较前稳健之馀，瑞典攻击手古艾臣更加成为近月德甲最出位奇兵，今季已入11球，上轮杀入禁区压过门将纽布射中门楣，赢唔到史浩克好唔抵，今晚乘勇作客禾堡，黑柴相信抢分成功机会甚高。