推荐预测：车路士细盘睇定食

车路士细盘睇定食

踢出队形副选一样坚

今晚英超焦点赛事「富林区打吡」，车路士主场迎战富咸。两军各有抢分目标，车仔虽要兼顾联赛前4及欧联4强次回合，但球队喺杜曹调教下稳定性极高，已建立一套成功战术体系，无论正选或后备上阵影响不大，富咸护级作客强队亦希望抢得1分得1分，肯定死守，撞正车仔近9场主场，8次开2球或以下，捧2.5球入球细。

车路士喺周中欧联4强首回合，同拥有主场之利嘅皇马踢成1比1，全程形势不落下风，如非迪姆华拿上半场浪费机会，更有机会早早赢波取得领先优势，下半场车仔施展拿手嘅传控踢法，保持和波战果至完场。

呢场波值得留意嘅一点係，领队杜曹喺下半场中段一次过调入夏维斯、薛耶治同列斯占士，换走迪姆华拿、基斯甸普列锡及艾斯派古达，3个调动都只係「位换位」，证明现时车仔嘅体系运作非常成熟，并无实际正选同副选之分，任何球员踢都可以发挥同样功效，所以今场即使轮换，对发挥都唔会有太大影响。

富咸遇强1分都收货

富咸上周联赛另一场「伦敦打吡」，补时阶段被阿仙奴逼和1比1，现时同尾4嘅白礼顿相差7分，联赛仲有5轮，数字上仍然有护级机会，今场当然希望可以抢分，但佢哋过去6次联赛对住车路士输晒，今场为求1分肯定死守。车路士平均质素远超富咸，今场绝对可以睇定嚟食，球队近9场主场8次开2球或以下，今场係小胜格，主W太热，转捧2.5球入球细好过。