推荐预测：韦斯咸作客大无畏

韦斯咸作客大无畏

连格孭飞强攻纽卡素

除咗英足盃4强战，今晚亦有两场英超上演，其中头场纽卡素主场硬撼4哥韦斯咸。纽卡素仍要抢分护级，「锤仔帮」亦要力保前4抢下届欧联入场券，大家都冇得缩，而且「锤仔帮」中场连格已升呢「连王」，入波助攻停不了，弗到冇朋友，佢哋近8场联赛有6场开3球或以上，中位数2.5球嘅入球大乃不二之选。

纽卡素依家排紧尾4，领先位处降班区嘅富咸6分，但护级形势仲未稳阵，必搏尽抢分求尽快上岸。查实「喜鹊」已有起色，继逼和热刺2比2后，上场作客更加反胜般尼2比1，重拾信心，而且今场有地利之助，一定想力争赢波3分，但睇番佢哋近3场共失6粒，防守唔太稳。

4哥韦斯咸仅领先车路士1分，为咗取得下届欧联入场券，再冇失分空间。好彩「锤仔帮」攻力强劲，近3场共轰9粒，冬季转会窗从曼联借入嘅中场连格更弗到冇朋友，上阵9场贡献8球及3次助攻，包括上场对住李斯特城梅开二度，有「连王」压阵唔忧冇波入。但韦斯咸入得又失得，近3场合共失7粒，踢法可说有前冇后，2.5球嘅大盘更值博。

锡菲联谢晒捧狼队Ｗ

尾场有狼队主场迎战锡菲联，狼队虽然近5仗只得1胜1和3负，睇落好差，但3场败仗係输畀曼城、利物浦同韦斯咸，其中两仗只输1粒，计落唔算失礼，而且上仗有「大隻佬」艾达马查奥尔打破其48场英超入球荒，以1比0击败富咸，证明狼队对住弱旅仍有赢波把握，遇上对护级已打定输数、近9仗联赛1胜8负嘅包尾大幡锡菲联，可望乘胜追击。