摘要：巴塞争气波半W冇甩拖今晚西甲补赛，4哥巴塞隆拿主场迎战下游分子艾尔切。巴塞上仗「临天光濑尿」失分。主帅朗奴高文罕有地嬲到爆，遇上客场脚仔软嘅艾尔切，为博反弹必定抢缰，半场主胜有买趁早。巴塞继欧联16强...
巴塞争气波半W冇甩拖
今晚西甲补赛，4哥巴塞隆拿主场迎战下游分子艾尔切。巴塞上仗「临天光濑尿」失分。主帅朗奴高文罕有地嬲到爆，遇上客场脚仔软嘅艾尔切，为博反弹必定抢缰，半场主胜有买趁早。
巴塞继欧联16强首回合惨败畀巴黎圣日耳门后，日前联赛对住弱旅卡迪斯，早早领先兼全场控制战局下，中坚基文迪朗格勒竟喺完场前无谓犯规搞到输12码，被逼和1比1痛失两分，主帅朗奴高文喺球证吹完场鸡后嬲到直接返入更衣室，未有如以往同众将击掌。赛后高文仲话呢次失分，比起输畀圣日耳门更失望，因为未能乘住马体会输波再追近啲，依家落后8分，预计班大帝已被佢省到「立立令」，誓要踢番场争气波。
艾尔切作客脚仔软
虽然巴塞踢到咁曳，但美斯依然交足货，踏入2021年，佢于各项赛事12仗攻入11粒，唔单止係今年5大联赛入波最多球员，并以16个士哥，同马体会嘅苏亚雷斯并列西甲射手榜榜首，上仗咁样大意失分，今仗实搵艾尔切出气。
艾尔切上仗「护级6分波」赢伊巴1比0，终止连续16仗联赛不胜颓势。不过呢支升班球队客场认真麻麻，今季10场作客联赛，只得2胜3和5负，单计近5仗则4度落败，而呢4仗全部于上半场已经落后，可见初段演出腾腾震，造访来势汹汹嘅巴塞，随时半场都顶唔住，半场主胜有计。
