推荐预测：韦斯咸执到宝唔赦热刺

今晚英超早场上演「伦敦打吡」，韦斯咸主场斗热刺，「锤仔帮」韦斯咸可以话係今季「神奇球队」，虽然阵中冇乜球星，但胜在实而不华，佢哋近8场联赛赢咗6仗。反观由名帅摩连奴领军嘅热刺，即使有两位星级射手哈利卡尼、孙兴民助阵，但成绩令人失望，近5场联赛更加输咗4仗，梗係捧当头起嘅韦斯咸主胜。

连格加盟锤仔生晒

今场属于两位前曼联领队嘅对决，以近况嚟睇，当然係韦斯咸主帅莫耶斯表现明显胜一筹，佢带领人脚质素平庸嘅韦斯咸，成为有力争入前4位嘅球队，实在难能可贵。同时莫耶斯签人亦独具慧眼，早前向曼联借用连格，呢位被「红魔鬼」投閒置散嘅中场，首次为韦斯咸上阵对维拉，就射入两球，上场对锡菲联亦博到12码，表现极具威胁，以「锤仔帮」近5场主场4胜嘅走势，今场胜算甚高。

热刺自从上年12月中不敌利物浦之后，表现急转直下，近5场联赛除不敌劲旅车路士、曼城之外，甚至输畀护级球队白礼顿，可见热刺整体状态低迷。再者，佢哋刚于周中飞赴匈牙利出战欧霸盃32强赛事，球员经过舟车劳顿，今场又要作客，体力难免不及以逸待劳嘅韦斯咸，捧主胜为佳。