推荐预测：锡菲联遇强玩大佢

锡菲联遇强玩大佢

热刺求反弹唔会缩

英超周日晚锡菲联主场迎战热刺，「包尾大幡」锡菲联依家形势水深火热，仲想护级嘅话，必定要乘胜继续抢分，今仗主场出击唔会死守求和。锡菲联早前喺英足盃拎到今季首场胜仗后，上场联赛又一鼓作气击败纽卡素，大大提升球员士气，今仗继续于主场斗热刺，预料战情会较为开放，中位数2.5球嘅入球大值博。

锡菲联今季表现走晒样，开锣至今只取得5分，敬陪末席。幸好佢哋上星期英足盃以3比2淘汰布里斯托流浪，拎到今季第一场胜仗，球员信心返晒嚟，周中主场迎战纽卡素更主动出击，全场围住对手狂攻，最终如愿再下一城。加上佢哋面对传统Big 6球队都较为进取，虽然今季5次面对Big 6均要输波，但却喺阿仙奴、利物浦、车路士同曼联身上拎到入球，4场总入球开3球或以上。

热刺兵不满巴利坐冷板

另边厢，热刺拥有哈利卡尼同孙兴民呢对全英超最强前锋组合，可惜近期防守欠稳近6场英超只有1胜。阵前更传出爆发内讧，英国传媒指有部分主力认为加里夫巴利喺操练时，表现出色，应该获得更多上阵机会，但领队摩连奴却故步自封，将呢位威尔斯国脚投閒置散，令球队成绩一直冇改善。估计今场遇上包尾嘅锡菲联，摩佬或会「鬆手」畀巴利落场，以顺应民意，而「大圣爷」亦会把握机会争取入波，令开出入球大机会更高。