摘要：车仔Vs热刺睇入球骚伦敦打吡射手大火併今晚英超爆发伦敦打吡，3哥车路士主场火併1哥热刺，亦係两军主帅、徒弟林柏特与恩师摩连奴大对决。车仔今季崇尚进攻，尤其係主场出击零舍进取，挟6连胜之势唔会缩，不过热...
车仔Vs热刺睇入球骚
伦敦打吡射手大火併
今晚英超爆发伦敦打吡，3哥车路士主场火併1哥热刺，亦係两军主帅、徒弟林柏特与恩师摩连奴大对决。车仔今季崇尚进攻，尤其係主场出击零舍进取，挟6连胜之势唔会缩，不过热刺两大神锋哈利卡尼及孙兴民脚风坚顺，车仔主攻更加啱晒佢哋打反击，势必合演入球骚，2.5球嘅大盘有买趁早。
随住一班新兵逐渐融入，车路士主帅林柏特嘅进攻打法开始成形，以快速见称嘅德国射手迪姆华拿，近5场联赛已入4粒，伤愈复出嘅翼锋薛耶治，5次联赛上阵亦入1球及贡献3次助攻，令攻势更加入肉。早前确诊新冠肺炎嘅中场夏维斯已经好番，仲喺日前欧联作客雷恩复出，若需要高空轰炸，「蓝战士」仲有中锋谭美阿巴谦、基奥特及翼锋赫臣奥杜尔候命，后两者日前对雷恩齐齐入波，协助车路士赢波提早出线16强，并缔造6连胜弗爆。由于进攻瓣数甚多，造就车仔今季9场联赛入22粒，暂时係英超火力最强球队，连盃赛在内，近6场主场有5次开3球或以上，今场必藉地利抢攻先发制人。
老孙卡尼着晒火
与热血少帅「林伯」相比，「寸王」摩连奴更显老谋深算，喺佢改造之下，王牌哈利卡尼经常堕后策动进攻，不过表现依然Sharp醒，今季9场联赛入7粒兼有9次助攻，佢不断走动引开对方守衞嘅同时，令好拍档孙兴民有更多后上入楔埋门机会，「老孙」至今联赛有9球进帐，位居射手榜次席，绝对係英超今季最强进攻组合。唔好忘记，热刺后备席仲有加里夫巴利、迪利阿里同卡路士云尼斯奥斯等候命，后者喺日前欧霸对卢多格德斯入2粒兼有助攻，最终大胜4比0，如果要变阵都大把奇兵用。
由于车仔主攻，令后场暴露更多空位，更适合「寸王」嘅反击战术，呢场师徒之战胜负难料，但应该多波入，大盘咪错过。
