摘要：今晚另一场较瞩目嘅热身赛，係有主帅杰斯丑闻缠身未能带队嘅威尔斯斗美国。威尔斯今场除咗冇杰斯，效力祖云达斯嘅艾朗蓝斯亦缺阵，只靠「大圣爷」加里夫巴利单天保至尊，未必能搞掂美国。美军有大班效力欧洲联赛球员...
今晚另一场较瞩目嘅热身赛，係有主帅杰斯丑闻缠身未能带队嘅威尔斯斗美国。威尔斯今场除咗冇杰斯，效力祖云达斯嘅艾朗蓝斯亦缺阵，只靠「大圣爷」加里夫巴利单天保至尊，未必能搞掂美国。美军有大班效力欧洲联赛球员，实力足以同威尔斯对抗，但佢哋自2月后未比赛过，默契成疑，今场入波未必会多。
巴利状态未足难担大旗
由于杰斯涉嫌打女朋友被捕，今轮3场国际赛唔会带队，会由罗拔比治以看守领队身份领军。不过罗拔比治今场遇上难题，攻守各有主力受伤缺阵，祖记中场艾朗蓝斯唔踢得之馀，仲有史云斯后防大将卡班高倦勤。
首席球星加里夫巴利回归热刺后，虽然已经为球队上阵，但状态未係十足，罗拔比治承认，「大圣爷」未必会正选上阵，前面入波要靠卡迪夫城前锋基化摩亚及列斯联嘅泰拿罗拔斯，埋门级数始终差啲。
美国大军有多名5大联赛球员压阵，包括里尔前锋添莫菲韦亚、多蒙特嘅基奥云尼雷拿、祖云达斯中场韦斯顿麦坚尼及富咸后衞添列姆等，实力唔曳，当中前世界足球先生韦亚囝囝添莫菲韦亚令人期待。不过，由于疫情关係，美国自2月以嚟从未进行过正式比赛，不论球员同职员都要互相适应同建立默契，预料佢哋都会先以稳阵行先，今场相信入波唔会多。
