推荐预测：白礼顿抢分撑下盘

白礼顿抢分撑下盘

红军封王后漫不经心

今晚英超尾场，新科冠军利物浦作客白礼顿。仍然要抢分护级嘅白礼顿，复赛获2胜1和1负，手下败将仲包括阿仙奴；相反目标已达嘅红军表现漫不经心，而且佢哋近5场作客只得1和4负0入球，白礼顿挟地利有望抢分，受让一球捧下盘。

讲真今场波观赏价值唔算高，除非你係死忠球迷，如果要返工嘅话，捱眼瞓睇波真係要谂过！不过唔好睇唔代表唔好赌喎，从博彩角度，呢场其实几好路。

利物浦近5场作客冇入波

白礼顿现时排第15位，离降班区算係有段距离，所以今场对住红军无话要必胜，打和执1分球队应该都好满意。睇番白礼顿赢阿仙奴2比1场波，佢哋初段都係踢稳守求1分，只係落后之下焗住要攻抢分，点知反胜到兵工厂。今场对住利物浦，「海鸥」更有自知之明，唔会同冠军球队硬撼。

利物浦亦唔好得去边，复赛后表现有番昔日嘅「海鲜味」，尤其2场作客更只得1和1负，连停摆前，红军近5仗作客竟然未入过波，只得1和4负，真係吓死人。

今场利物浦好大机会进行轮换，收起Keep住有少少伤嘅穆罕默德沙拿，改用南野拓实伙拍罗拔图法明奴及沙迪奥文尼，锋力骤减之下，让球盘要让一球有啲过火，宁捧白礼顿下盘好过。