推荐预测：祖记全力衝冠兰唔住

C朗当弗杀得性起

今轮意甲重头戏，AC米兰主场迎战祖云达斯。榜首嘅祖记全力衝冠，重开后近4场全胜，走势强劲，王牌球员C朗更连续有士哥，即使主力保罗戴巴拿同马菲斯迪历特停赛，凭其雄厚阵容力足杀败表现时好时坏嘅AC米兰，客W值得跟进。

作为意甲传统劲旅，AC米兰近年表现「唔上唔落」，佢哋喺联赛重开后首2场赢波，但之后作客护级份子史帕尔，要对手打少个兼摆乌龙先赛和2比2，上场作客2哥拉素，反而大胜3比0，水准相当反覆。虽然AC射手伊巴谦莫域已复出，但呢位「神锋」始终年事已高，匆匆再战未必回得切气，即使主场出击亦不宜高估。

戴巴拿迪历特停赛未惊过

另边厢，祖云达斯就醒神得多，踏入季尾愈战愈勇，王牌C朗频频有士哥，继早前对热拿亚射入时速达105公里世界波后，呢位葡萄牙球星上场又入靓罚球，亦係佢相隔394日之后再凭罚球直射破网，助祖记以4比1轻取拖连奴，状态番晒嚟。虽然两大主力保罗戴巴拿同马菲斯迪历特累积够5面黄牌，今场要停赛，但本身祖云达斯阵容球星如云，冇咗保罗戴巴拿，用同C朗「夹惯夹熟」嘅希古恩效果一样靠得住。

事实上，祖云达斯近年喺意甲横行霸道，实力超晒班，翻查往绩，祖云达斯过去6次联赛对AC米兰全胜，包括近2次作客AC米兰都赢2比0，可见两队级数有明显距离，今场一定捧祖记客胜。