推荐预测：皇马华伦大驳火

皇马华伦大驳火

皇马后衞沙治奥拉莫斯

拉莫斯争做带刀侍衞

今晚西甲快车压轴大战，2哥皇家马德里喺B队嘅迪史堤芬奴球场硬撼华伦西亚。「银河舰队」近年对亲华伦，都踢得相当开放，队长沙治奥拉莫斯杀得性起，誓要做西甲头号「带刀侍衞」，为争冠不容有失，华伦则要争取跻身欧战席位，预计今仗双方会大驳火，2.5球嘅入球大稳开。

皇马喺联赛停摆期间冇比赛，球员得到充分休息之馀，更有机会调整体能状态，其中夏萨特嘅情况备受关注。呢名比利时翼锋被视为C朗离队后「银河舰队」嘅新领军人物，可惜佢加盟以来一直受伤病困扰，原本好大机会提早收咧，点知突然停摆畀佢休养生息，上仗重开赢伊巴3比1之役即交出助攻，造就队长沙治奥拉莫斯攻入佢第67个西甲士哥，如果拉莫斯今仗再有进帐，就超越巴塞名宿「重炮手」朗奴高文，成为西甲史上入波最多嘅后衞，为独佔头号「带刀侍衞」之名，必落力争取士哥。

两军交锋惯性对攻

事实上，皇马确係全民皆攻，连同上仗左闸马些路建功，佢哋今季联赛共有19名球员有进帐，係欧洲5大联赛中入波人数最多嘅球队。不过，皇马上仗早早领先3粒后，下半场踢得劲hea，激到主帅施丹发火，赛后喺更衣室捉住班球员「照肺」，而「沙拉」作为后衞，经常杀得性起谷上前，兼且右闸丹尼尔卡华积又有伤上阵成疑，令防线存隐忧。

另一边厢，8哥华伦西亚上仗打吡战喺末段开纪录，谂住赢硬利云特，点知守将莫达迪亚卡拜喺补时8分钟于禁区内犯规，搞到输12码被逼和1比1，原本几乎到手嘅3分，咁样呕番2分出嚟坚惨，连埋停摆前在内，莫达迪亚卡拜连续两场联赛累球队输3球12码，绝对係计时炸弹。不过「蝙蝠兵团」对亲皇马都唔太输蚀，近14次碰头只输6次，其中12次开3球或以上，可见两军交锋例斗攻，2.5球嘅大盘热得有道理。