推荐预测：西維爾W有利可圖

體力往績瓣瓣贏晒

西甲復賽即大開快車，周二凌晨上演重開後第2輪賽事，頭場先有利雲特於中立場鬥西維爾；利雲特上場喺打吡戰逼和華倫西亞勝在有運，不過佢哋今場有首席射手羅渣馬迪停賽，加上近4次對賽全部輸晒，面對狀態正勇嘅西維爾料凶多吉少，西維爾客W值得捧場。

西甲上周五凌晨重開，暫定7月19日煞科，各隊要喺5個多星期內完成11輪比賽，差唔多每隔3至4日就要踢1場，對球員體力要求極大；利雲特前鋒羅渣馬迪上場對華倫西亞喺法定時間完場前15分鐘領紅牌被逐，搞到球隊最後階段10人應戰，就算最終憑干沙路美利奴補時射入12碼追平，但成班人消耗大量體力，加上佢哋比西維爾遲一日比賽，體力更加輸蝕。何況羅渣馬迪今季喺聯賽攻入11球，佔球隊總入球3分1，今場佢要坐波監，對進攻造成極大影響。

西維爾上場主場以2比0輕取同市宿敵貝迪斯，表現充滿說服力，其中阿根廷翼鋒奧甘波斯入波兼助攻，連停擺前聯賽已經連續5場有士哥，腳風大順，而且西維爾近4次鬥利雲特全部贏晒，體力、往績一面倒佔優，有力反客為主開客W。

神經刀貝迪斯輸盤格

至於尾場由貝迪斯主場對CF格蘭納達。貝迪斯今季表現神經刀，主場既可擊敗皇馬，面對馬略卡、伊巴等下游隊伍卻又失分，上場輸畀西維爾，球員狀態明顯未番嚟；格蘭納達對住前列基達菲喺落後1球之下，反勝2比1全取3分，連停擺前聯賽保持5戰不敗，受讓必捧讓球客勝。